Homili Hari Raya Maria Diangkat ke Surga

Perayaan Ekaristi Hari Raya Maria Diangkat ke Surga di Keuskupan Ruteng bertepatan dengan minggu inkulturasi. Karena itu, di Gereja Katedral Ruteng, misa dirayakan dalam bahasa Manggarai. Berikut homili Hari Raya Maria diangkat ke Surga dari Pastor Kapelan Katedral Ruteng, RD Lian Angkur.

Homili Hari Raya Maria Diangkat ke Surga

RD Lian Angkur

Hari Raya Maria Diangkat ke Surga

Oleh: RD Lian Angkur

One randang leso mese, Ende Maria teti ngger eta Surga, Injil Lukas kreba tentang Hi Maria ngo la’at, cumang ase kaen, hi Elisabet ata reme weki mendon agu Dere Naring di Maria kamping Mori Kraeng Ema. (Injil mengangkat kisah Kunjungan Maria ke rumah Elisabet saudaranya dan Madah Pujian Maria/Magnificat Maria). Ngo cumang ho’o, du poli tiba le Maria kreba de Malekat Gabriel, ai patun hi Maria jiri Ende de Morin, ata loas mori Yesus. Ai du hitu, kreba kole le malekat, hi Elisabet reme weki mendon, one umur tu’an.

Jadi, ngo la’at di Maria ho’o betuan:

Te can, Hi Maria nanang ngo tombo kreba de Malekat Gabriel ata caing agu hia, agu tombo, ai hia reme weki mendon kole, kudut loas Mori Yesus. Te suan, Maria ngo cumang, kudut bengkes agu mberes keta tu’ung nain hi Elisabet ata reme weki mendon one mose turung tu’an. Le mesen keta momang, hi Maria ngo la’at ka’en hi Elisabet. Toe manga pingan li Maria, tadang ko toe, tukeng ko toe salang lakon, tama keta cumang hi Elisabet; maram lako lage poco mese.

Kamping Elisabet, ngo la’at ho’o, toe la’at bon; senang agu gerak keta nain, ai hi Maria dade Mori Yesus, le hitu ga penong le nai Nggeluk keta hia. Bengkes keta nai de Elisabet ai mai keta run Ende de Mori ngger one mbaru kaeng diha, wiga roeng koe one tuka diha jekal agu naka keta. Ali mesen bengkes agu senang, Elisabet naring agu caro hi Maria ata penong berkak de Morin one mai bahi reha ine wai one temu tana lino; “Berkak keta ite one mai sangged inewai, agu berkak keta wua tukam. Ceing ketak aku ho’o, wiga ende de Morig mai la’at akuy?”.

Co tae de Maria du denge naka agu naring di Elisabet? Lelo lite, hi Maria toe mese nain. Hia idep co betuan naring di Elisabet ho’o. Nuk li Maria, toe rodo naring nenggitu li Elisabet eme toe landing le mesen momang de Morin kamping ise cua agu latang te sangget ro’eng do. Hitu mangan Naring di Maria kamping Morin.

One mai Naring hitu, manga telu tombo de Maria lut Wintuk di;a de Morin latang itet manusia. Te can, Morin toto kuasan ali pende le limen, agu pande mbihi-mbehar atau situt mese keta naid. Tesuan, Morin na’a nggere wa ata situt manga kuasad eta mai serigad, agu teti ngger etas ata situt pele-wa. Te telun, Morin pande toto taungs situt di’ad, one ata situt darems, agu jera ata situt bora ngo agu lime kanangd. Berkak agu momang de Mori Kraeng toe manga cemoln latangt ata siot cengka nain agu imbi tu’ung Hia.

Naring di Maria kamping momang agu kuasa de Morin, mai keta wa mai nain, ai le pile agu teti hia le Morin. Hi Maria, nuk one nain, toe kop agu palong kudut tiba tugas de Morin, landing Mori Kraeng belut tu’ung nain agu hia, wiga hia kole cengka nain agu lorong liha reweng de Morin. Mai tae di Maria: “Tu’ung-tu’ung keta aku ho’o mendi de Mori Kraeng, jari one aku lorong taem hitu.” (“Sesunggunya aku ini adalah hamba Tuhan, jadilah padaku menurut perkataanmu itu”). Kamping Hi Maria, Mori Kraeng hitu, tu’ung-tu’ung penong berkak, kuasan, agu momang. Agu sangged situ, toto nain Mori Kraeng one ata koe, ata darem, ata lengge, ata pele wa, ata beti, atat cengka naid kamping di’ad de Morin. Ngong te nggo’o: kamping ata mese nai, ata bora sot toe lelo ata lengge, ata sot lonto one serigad agu toto kuasad agu ata rakus, ata so’ot tadu agu nendep naid kamping ase kaed, toe lelo koles agu ideps le Mori Kraeng. Hitus de betuan one mai naring di Maria.

One weki agu mosen hi Maria, apa ata get agu nuk de Mori Kraeng, itas. Hi Maria poli toto nain agu imbi kamping Mori Kraeng, agu leho nain, cengka nain agu nuk kamping hae atan, le pande.

Te can, neho ngo cumang hi Elisabet, du hitu Maria ba berkak agu kreba di’a. Hia toe sendo berkak agu kreba di’a hitu latangt weki run kanang, landing nuk kole liha ata haen, kudut cama-caman tiba agu noing berkak hitu. Momang tu’ung keta liha hi Elisabet lawang hae kilon. Bae kole le run hi Maria ai hia Ende de Mori Yesus, landing toe mese nain agu toe tombo do. Ai ata agil agu lembak nai kali ata nganceng cengka nai; ba berkak agu kreba di’a kamping hae ata. (Status barunya sebagai Ibu Tuhan, tidak membuat dia merasa diri istimewa, lebih dari yang lain. Ia tetap rendah hati. Hanya orang yang rendah hatilah yang peduli dan rela berbagi berkat dan kegembiran kepada orang lain. Itulah Maria). Be le mai hitun, one mai naring di Maria, hia nanang toing sangget taung ata, lawang one mose lino ho’o, kudut mose lorong bet agu nuk de run Mori Kraeng. Hi Maria kole toing agu titong sangget ata do, sot mose toe nuk agu pinga Mori Kraeng agu toe lelo ko deu agu hae ata.

One mai Kreba Di’a/Injil leso ho’o, poli itan lite nai nggelok di Ende Maria. Le nggelok nain one mosen, itu tara imbi le Gereja, hia teti ngger eta Surga agu mai nitu main, hia ngaji kole latangt ata serani, neho one mai ngaji dite leso ho’o.

Ata kudu nuk agu idep laing lite one mai ngaji agu randang dite leso ho’o, nenggo’o: Mose ditet manusia toe cemoln one mata, landing manga kole mose be le mai hitu, ngong mose surgawi: ite kole nganceng teti ngger eta surga. Landing, nganceng lite tiba agu ita mose surgawi, eme ite nganceng ba weki, toto wintuk, agu tu’ung-tu’ung imbi neho hi Maria, du remeng kaeng one lino ho’o.

Ca rei daku latang ite: Apa ata nganceng lut agu idep lite one mai mose de Ende Maria?

Te can, one cumang tau dise Maria agu Elisabet; ite paka cengka nai kamping ase kaed, neka hemong lambu mbaru, kudut ba berkak agu gerak, ba tombo ata kop, kudu manga mberes te we’ang gerak, wancing ngalis. (Perjumpaan Maria dengan Elisabat menjadi contoh bagi perjumpaan kita dengan yang lain. Sejauh mana kita memaknai sekaligus memanfaatkan setiap perjumpaan sebagai momen untuk berbagi berkat dan kegembiraan?)

Te suan, one mai Naring di Maria, manga betuan latang te sangget ite, nenggo: Neka hemong wali di;a kamping Morin; naring jari agu Dedek. Neka mese nai, neka nuk weki rut kaut ko hemong hae ata. Ai do kid ase kae baling mai ite ata lengge mosed, ata kasi asi, toe ita hang bara agu wengko weki, toe tua hang gula, saep hang mane. Patis lite gici ca arit, cingkes lite gici ca iret, kudu tawa cama-cama agu imus cama laing; tawa lima gantang, reges lima leke. (Madah pujian Maria/Magnificat Maria mengandung suatu kritikan sekaligus ajakan bagi setiap orang untuk tidak lupa bersyukur kepada Tuhan serta mewujudkan rasa syukur itu dengan senantiasa peka dan peduli terhadap orang lain, khususnya yang memderita; berlaku lembut dan menjauhkan kesombongan). Dalam diri Maria, semua kebajikan ini ada.

One mai randang mese leso ho’o, Hi Ende Maria, one tenang agu nukn, tegi sangget ite, roeng momang diha, kudut toto ata di’ad one mai ba weki agu gauk one mose leso-leso, kudut ite nganceng kaeng one gerak. Agu neka hemong Morin agu Ngaran. Neka oke imbi ata poli weri one nai dite. Mai kali ga ite: waeng waken imbi hitu kudu wake caler ngger wa, saung bembang ngger eta, agu toto imbi hitu one pande latang hae ata. (*)

Share on FacebookTweet about this on TwitterShare on Google+Share on LinkedInPin on PinterestEmail this to someone

Tinggalkan Balasan

Alamat email Anda tidak akan dipublikasikan. Ruas yang wajib ditandai *