Homili Minggu Biasa XII, Imbi Mori

Minggu Biasa ke XII, 21 Juni 2015 kemarin adalah minggu inkulturasi di Manggarai. Seperti diketahui, sejak perayaan Yubileum Agung Gereja Katolik Manggarai tahun 2012 silam, setiap minggu ketiga dalam bulan di Keuskupan Ruteng, perayaan Ekaristi dilaksanakan dalam bahasa Manggarai. Berikut homili pastor paroki Katedral Ruteng RD Daniel Sulbadri, Pr (dalam bahasa Manggarai) pada misa inkulturasi (21/6) tersebut.

homili minggu biasa XII imbi mori

RD Deny Sulbadri

Imbi Mori

Oleh: RD Deny Sulbadri

Kitab Ayub tombo landing hi Nabi Ayub, ata mberes imbi onè Mori Keraèng, sundur agu lorong wintuk de Mori. Maik hia hena le copèl mèsè agu calang da’at, sanggèt paèng agu wèang lawang pitu tau anakn’ rowa agu mora meres one ca leso kaut. Sanggèt haè reban sosok hi Ayub kudut asi hiang Mori Keraèng hitut pandè daat mosè data. Konèm nenggitu tombo disè, maik hi Ayub meku kin nain imbi onè Mori, toè hesot agu toe gegè. Toè manga cengatan ata ko ca o ca ata nganceng pandè behas imbi diha onè Mori.

Nenggitu kolè èmè itè hena le beti ko susa, nèka èmong keta ngga’ut, mangkong ata ko rabo agu Mori. Sanggèt ca o ca ata da’at onè mosè ditè, èmè toè le sala ditè, ngong situ manga betuan latang pandè tambang imbi, bengkes agu momang ditè onè Mori Keraèng.

Onè surak latang asè kaè Serani lau Korintus, tombo landing Mori Yèsus hitu ata ba hambor agu lètang tèmba ditè manusia ngger onè Mori Keraèng. Sanggèt mendo ndèkok data manusia, poli pola lè Mori Yèsus. Hia jiri ata ndèkok kudut sambè itè, le mata agu mosè kolè wa mai boa. Mori Yèsus lonto du racap wanang de Mori Keraèng Ema, jiri mu’u tungku – laro jaong pandè hambor agu selamak itè ata manusia. Ali hitu, sanggèn lawa Serani toe mosè latang weki ru kanang, maik mose ditè paka condo onè wintuk de Mori. Mosè weru hitut manga onè itè, manga betuan èmè ite campè haè ata. Èmè itè poli tiba hambor onè mai Mori, paka hambor hitu pati litè nètèng ata onè mosè raès agu meler onè ka’èng cama.

Do onè mai ata nungku de Mori Yèsus lasèng deko ikang onè sano Gènèsarèt, hitu’p tara isè baè di’a musi olon sano hitu. Konèm lèlon waè sano hitu lik kèta, maik calak doing soro nganceng tuan buru warat, pandè kèngko bombang mèsè onè sano hitu. Wiè hitu, du isè limbang sano cama agu Mori Yèsus onè wangka hitu, rodo cain kaut buru potè agu bombang golok, wiga wangka disè penong le waè agu kudut delep. Cang agu hohas gega nai le rantang walèk onè berèha sano, hitup kali ise iri era tègi campè onè Mori Yèsus: “Tuang Guru, toè kaut doing litè kudut walèk wangka ditè ho’o ga!” Ca mu’u kaut le Mori Yèsus kenta buru hitu, lik limot muing sano hitu. Du hitu muing kolè Mori Yesus loè isèt lasèng baè musi olo’n sano hitu: “Co’o tara rantangs mèu? Nèho nia kèta imbi de mèu onè Aku?”

One mosè ditè kolè, dondè itè cumang dungka buru warat agu pala cala bombang golok; pande hiri hera mosè ditè. Mangas ata copèl mosè ali rowa asè kaè, toè manga jiri uma batè duat, toe mopo sekola de mantar, lanta racap – merik weki. Lasèng ite èmè hena susa do, toè molor ba weki, èmong rabo ata; cèwè da’at kolè, itè mangkong ata bana ata pande da’at agu itè; nèho rapang: kosè uma ditè, tako paèng ditè, janto asè kaè ditè. Dot kolè lawa Serani ata mangkong Mori Keraèng toe sèngèt gesar disè, toè lèlo susa disè, toè agil pati berkak latang ata manusia. Sanggèt nggut atu nggaut ditè so’o, pandè toi rawi, ngong toe danga menteng imbi ditè onè Mori.

Krèba di’a de Mori Yesus pedè latang itè; ngong sanggèt susa ko da’at onè mosè, toè ngancèng poli laing le ngga’ut, rabo, ko mangkong ata bana. Ata cèwè mèsè’n, nèho nian kaut da’at mosè ditè: imbi Mori. (*)

Baca juga: Homili Romo Deny: Cinta Yesus

Share on FacebookTweet about this on TwitterShare on Google+Share on LinkedInPin on PinterestEmail this to someone

Tinggalkan Balasan

Alamat email Anda tidak akan dipublikasikan. Ruas yang wajib ditandai *