Ngaji Manggarai Bagian Ketiga

Website resmi Paroki Katedral Ruteng pada kolom Doa, kembali menghadirkan Doa-doa dalam Bahasa Manggarai. Kali ini, pada Ngaji Manggarai bagian ketiga, kami hadirkan Doa Pagi dan Malam.

Ngaji Gula

Yo Mori agu Mori Keraèng daku
Aku mai onè ranga Ditè Mori, te suju Itè, Mori mèsè kèta
Aku wali di’a agu Itè, landing sanggèd ceca ata tiba laku
Cèwèn kolè landing Itè poli tinu aku one wiè
Aku condo tèing agu Itè, wakar agu weki daku, agu sanggèd ceca daku
Neki agu pucu Nggeluk de Mori Yèsus
Aku tèi agu Itè sanggèd gori daku, ata pandè laku leso ho’o
Aku pandè sanggèd gori situ, kudut suju Itè
Kong wakar daku haèng mosè tèdèng lèn
Tambangkolè, aku gori haèng sanggèd Indulgensia
Aku ngancèng haèng, le ngaji agu le gori
Aku nuk mosè leso ho’o, nèho ata serani di’a, agu te lut ngoèng ditè, Mori
Aku ngoèng te pandè di’a-di’a, sanggèd batè gori daku
Campèkoèk aku le widang nggeluk, te lorong adak serani
Pucu di’a kèta de Mori Yèsus,
Baèngkoè ami, agu asè ka’è dami, ata toè di lut Agama tu’ungs.
Ngaji de ga telungkalin ‘Tabè o Maria’ te hiang hi Maria Nggeluk, ata toè taki lè ndèkok mbatè
Tabè-o Maria… (3 X)
Cako: O Maria, Itè toè manga ndèkok mbatè, lètè endèm dè’i
Wale: Tegi koè latang te ami, ata bengkes sèmbèng Litè
 Fransiskus Savèrius Nggeluk, ngaji koè latang te ami, agu latang te sanggèd ata lonto onè tana Indonesia
Thèrèsia Nggeluk, ngaji koè latang te ami, agu latang te ata kapir, du temu tana lino
Yèsus, Maria, Yoseph, gèrakkoe ami, campèkoè ami, jagakoe ami, kong ami ocok surga
Malaikat de Mori Keraeng, ata lami aku, gerakkoe aku, jagakoè aku, dadangkoè aku, jagakoè aku, landing Mori Keraeng di’a, jera itè lami aku
Ata Nggeluk ata sèmbèng aku, agu sanggès kèta mèu ata Nggeluk, woè de Mori Keraèng ngajikoè latang te ami
Yo Ema dami… Tabè-o Maria… Aku imbi… Campulu perènta ada de Mori Keraèng… Lima perènta adak de Gereja… Ngaji imbi… Ngaji bengkes… Ngaji momang
Yo Mori, Ite Jari-Dèdèk, lobo limè Ditè mosè daku
Beti agu di’a, mosè agu mata, pati Lite nètèng ata
Nia kèta tèing Litè, tiba kaut laku
Campèkoèk aku, Mori Yèsus, kudut ocok surgak
Yo Mori, ata gawas nai, tèing koè mosè ce nai,
Agu sanggèd ata serani ata poli mata. Amèn

Ngaji Wie

Yo Mori agu Mori Keraèng daku
Itè Jari-Dèdèk tèi ceca do kèta agu aku
Itè poli sambè aku, le dara wegit de Anak lèca Ditè
Itè poli jaga kolè weki agu wakar daku, tèdèng leso hoo
Landing sanggèd ceca situ, aku tegi sembeng Litè, tèdèng wiè ho’o
Nai Nggeluk wa’u, gèrakkoe nai daku kudut pecing taungs ndèkok daku
Campèkoèk aku, te teser tu’ung landing ndekok situ…
(Nukkoe damangs gori de hau tèdèng leso ho’o bao, kudut tepecing, aram poli pandè ndèkok le nuk, le belek, le curup, le gori, ko le ngondè, te lut batè gori de hau)…
Ngaji Teser: Yo Mori Keraèng…
Ngaji de ga latang te hae diding dite agu latang te sangged ata kapir:
Yo Ema Dami… Tabè-o Maria…
Cako: Pucu di’a kèta de Mori Yèsus
Wale: Baèngkoe ami agu asè-ka’è dami, ata toe di lut Agama tu’ung
Tabè-o Maria (3 X)
Cako: O Maria, Itè toè manga ndèkok mbatè lètè endèm dè’i
Walè: Tegikoè latang te ami, ata bengkes sèmbèng Litè
Yèsus, Maria, Yosèp, gèrakkoè ami, campèkoe ami, jagakoè ami kong ami ocok Surga
Malèkat de Mori Keraèng, ata lami aku, gèrakkoè aku, jagakoè aku, dadangkoè aku, titongkoè aku, landing Mori Keraèng di’a jera Itè te lami aku
Ata Nggeluk ata sèmbèng aku, agu sanggès kèta mèu Ata Nggeluk, woè de Mori Keraèng, ngajikoe te ami
Yo Mori, Ite Jari-Dèdèk, lobo lime Ditè mosè daku
Beti agu di’a, mosè agu mata, pati Lite nètèng ata
Nia kèta tèing Litè, tiba kaut laku campèkoèk aku Mori Yèsus, kudut ocok surgak
Yo Mori ata gawas nai, teingkoè mosè cenai, agu sanggèd ata serani ata poli mata. Amèn

Share on FacebookTweet about this on TwitterShare on Google+Share on LinkedInPin on PinterestEmail this to someone

3 gagasan untuk “Ngaji Manggarai Bagian Ketiga

  1. Bengkes keta neho bongko nai woko cumang one internet sangged ngaji Manggarai soo.

    Terima kasih latang te sangged weki serani ata landing le nggalas nai poli patid ngaji soo kamping lawa serani Manggarai ata elor one tana data.

    • Terima kasih ai poli cama-cama bacang ngaji so’o. Neka hemong ngaji, tegi berkak agu sembeng de Mori latang mose dite. Tabe

  2. Tmks latang artikel ngaji serani one natas hoo dia keta rasan ngaji serani one nai cee tanah mbeot porong sangget ite tiba gerak salang one mai Mori Nggeluk amin

Tinggalkan Balasan

Alamat email Anda tidak akan dipublikasikan. Ruas yang wajib ditandai *